الاثنين، 13 فبراير، 2012

مالهاش حل ؟




مالهاش حل ؟

لما تقع كارثه وتجد الكل اخذ دور المحلل والمحقق يبقى مفيش غير انك تتكلم فى حاجه تانيه خاااااااالص
لما تبقى ناجح وتلاقى حد بيقولك ببرود  وهو متقمص شخصية الناصح المخلص الامين اتمنى الا يؤثر بالسلب على حياتك  فى الحاله دى  ارسم ابتسامة الموناليزا
لما تكون بتحب كل الناس وبتعامل الكل معامله واحده  وتلاقى المقابل فتور او لا مبالاه اضحك علشان الصوره تطلع حلوه
لما تكون  وفي ومخلص فى عملك ومشهود لك بذلك حتى من مرؤسيك
وتجد الزملاء  ينتقدوك فى الحاله دى كبر الجي  على رأى دبور
لما تلاقى الصبح جار لك بتضايق لما بتشوفه  بدل ما تكتئب ألقى عليه السلام واسحبها فى سرك
لما تفتح التليفزيون وتلاقى الاخبار بتقول فى اعتصامات  اضحك وقول اتعودنا
لما يجى يوم الجمعه من غير مليونيه بهدوء كده ارجع نام تانى او اتأكد انه يوم الجمعه ولا لآ
لما تزور قريب لم تره منذ شهور  وتجد لقاءه  فاااااااااتر وكأنك مفارقه امس  متحرقش دمك اضحك وغيظه
لما يبقى عند ابنك امتحان انجلش  بكره وتتفاجىء ان   الجدول اتغير واصبح المانى  عادى جداً  ...... مش هقدر اقولك متحرقش دمك
لما تبقى عايش فى مصر والكل يؤكد  ان الامن مستتب وان الغاز  واسطوانته  متوفره وان الاسعار تحت السيطره  تأكد انك تشاهد الاعلام المصرى
لما تلاقى فاتورة التليفون  او الكهرباء مبالغ فيها  وتشتكي ولا حياة لمن ينادي  عادى جدا ادفع احسن يشيلو العده
لما تلاقى ابنك لا سمح الله رايح المدرسه وهيمووووووووووت ومش عايز يغيب تأكد انها مش مدرسه ضمن فوضى التعليم
ولما تلاقى ابنك رايح المدرسه مجبر  تأكد اننا نسير على الطريق الصح وان المنظومه التعليمه  ليست تحصيل حاصل
لما يبدأ العام الدراسي وتتفاجىء ان مر شهر دون استلام الكتب المدرسيه رغم انك  دافع الرسوممتزعلش لانهم هيأجلو الدراسه علشانك وارد جداً
وكمان لا تتعجب خالص لو  رحت تطلب الكتب  تلاقى المدرس بذهول يقول لك  وكأنك من كوكب تانى  وتحس ان لسان حاله بيقول معقوله لسه فى حد بيجيب الكتب المدرسيه  اصل المناهج اتغيرت قبل العام الدراسى بيومين  عااااااااااادى جدا  فى الحاله دى سيبه وامشى
ولما تلاقى قامت فى بلادك ثوره والكل فرحان اتأكد ان فى حاجه غلط
ولما تكون فاهم ان الثوره تعنى التغير يبقى اتأكد  انها بتتسرق منك
ولما تبقى ثورتك محل اعجاب العالم والكل بيشيد بها وبشعبك  وتجد بلدك بس هى التى تصفها  بالهوجه يبقى اتأكد انك لسه فى مصر
لما تسمع لفظ محاكمه  تأكد انك بتشاهد  فيلم عربى ابيض واسود
لما تسمع لفظ مؤامره يتردد فى الاوساط العلميه  والمعمليه الفذه  وفى الاوساط والمحليه واعلامك يكررها كثيراً تأكد  ان المؤامره داخليه
لما يقولك مصر هتقع كمان شهرين   بسبب الثوره وعجلة الانتاج قولهم وانت بتضحك ثورة ايه كل سنه وانتو طيبين عمرها ما هتقع
ده بعدكم
لما تلاقى العربيات واقفه  ومش لاقيين  بنزين ولا سولار يبقى اتأكد انهم بيشغلوك عن حاجه او بيندموك على انك بتحاول تتغير
لما تلاقى الفاظ زى  ثوره مضاده  وفلول وقله مندسه  وايدى خفيه وطرف ثالث  تأكد انك بتستمع لبيان للقوات المسلحه
لما تبقى قاعد فى حالك وتلاقى الباب بيخبط اوعى تفتح  احسن دول زوار الليل خدعوك وقالو انهم  اختفوا او حلو هذا الجهاز الخطييييييير
لما تقعد تشوف جلسه من جلسات مجلس الشعب خليك كوووول وهات بونبون ماركة هولز وياريت تجهز كتاب  مفتاح الاعراب علشان الكتاتنى  ممكن يقلبها حصة اعراب
لما تبقى بتشوف مبارة كرة قدم وتتحول لمذبحه  متتستغربش  خالص  لانك هتلاقى الكل بيقولك  دى مؤامره
لما تلاقى الانتخابات تعدي بخير وبلا ادنى مشاكل يبقى اتأكد ان الفوضى فى البلاد قراااااااااار سياسى
لما تلاقى كمية رجال الامن المسخره لنقل المخلوع وتأمين محكامته  وفى نفس الوقت يعجز الامن عن تأمين مبارة كرة قدم يبقى اتأكد انم فعلا فى مصر
لما تلاقى ابنك بيتكلم ويقول فاكس  يبقى اتأكد انه من جيل الفيس بوك
لما تفتح كتاب ابنك الحساب بلانجلش وتلاقيه بالفرنسيه يبقى انت  اللى جاهل ومقصر
لما تبقى راكب عربيتك وتلاقى واحد غلبان بيقولك ساعدني فتديه فلوس رغم انك متأكد  انه مش محتاج فأنت اكيد مصري ابن مصري
 ولما تبقى بتتفرج على اغنيه او كليب وتلاقى استنكار من رفيق لك ويقولك ايه ده شغل قرآن  وبعدين لما تمشى من ادامه تلاقيه هو اللى بيتفرج  عادي جداً يبقى انت اللى نظرك ضعيف
لما تسمع الراديو وتلاقى كل البرامج بتقول نفس الكلام يبقى لا تيأس  لانه مفيش تغييييير
لما يجي 11 فبراير من غير مبارك يبقى ادعى انه يكون عام كله جمال وسرور
اخيراً لما حد يحاول بث الذعر فى نفوس المصريين  واطلاق كلابهم من البلطجيه والشعب يتصدى  لهم بكل حزم ويتوحد وينسى خلافاته يبقى افتخر انك مصرى وابن مصرى
أمل زياده




انكسار




انكسار

متى يشعر الانسان بالآنكسار  يسترجع أحداثاً مضى عليها سنوات
ويظل يلوم نفسه عليها ويتهم  نفسه بقلة الخبره ويختلق لنفسه الاعذار  ويبرر ما مر به  وقتها .....
انكسار   حزن عميق  نتيجة فقد  حبيب أو عزيز  او صديق
 شخص تفتحت أعيننا عليه من حبه نستمد الشعور بالامان ومعه نشعر بمعنى الحياه  معه ندفن اسرارنا  ..... وهمومنا وآلامنا .....
شخص يحتل مرتبه كبيره فى القلب  شخص بفقده نفقد الاحساس بالمكان والزمان
شخص فقده يزلزل الكيان  شخص مع توديعنا له  ودفنه تحت التراب
 نتأكد اننا دفنا معه كل معاني الحياة ....
شخص  فقده  يولد حزناً عميقاً  وجرحاً غائراً فى القلب دائما وابداً  له اثر كبير فى القلب ........ شخص لا ينسى مهما تظاهرنا بالعكس ....
ومع الوقت  نحاول اقناع انفسنا اننا اقوياء وتغلبنا على ضعفنا وانكسارنا  وتمر الحياة بحلوها ومرها ...
ومع اول لطمه من  لطمات الحياة التى لا تنتهى ابداً والتى لوهله نظن انها تقوينا  نجد انفسنا نسترجع تلك اللحظات  لحظات الانكسار وكأنها كانت امس ولم يمر عليها  سنوات
 انه الانكسار الذى جعلنا  كالريشه فى مهب الرياح
 ليس لنا قرار  فيما آلت اليه امور حياتنا  غير انه مقدر ومكتوب
انكسار نسترجع لحظاته مع تجدد شعورنا بأن  الحياة هزمتنا
غافلين ان لكل اجلاً كتاب
انكسار جعلنا ضعفاء ..... مهزومين
انكسار صعب تجد له دواء
 انه الانكسار الناتج عن رحيل عزيز ربما يكون الرحيل خيراً له  او بالاحرى هو خيراً له  بكل ما تحمله الكلمه من معاني
ترى هل لهذا  الانكسار من علاج ؟

نصيحه لكل من يمر بتلك الحاله
 عش حياتك كما هى وارضى بها كما هى ورضاك بها ليس ضعف وانما  عن قناعه  ...
اصبر على الابتلاء  وتأكد ان مع ميلاد كل يوم جديد تشرق الشمس
 وكن موقناً انه مادام قلبك لازال ينبض  بالحياة فدائماً هناك امل ...فى الغد
ربما تتأخر فى الظهور قليلا ً وربما تكون حولك ولا تشعر بها
ربما تجدها فى تربيطه على كتفك من صديق
او من لمسه حانيه من حبيب
او من  كلمه ترضيك من عزيز
او من ابتسامه تلوح فى الافق ترسلها لك النجوم من وسط الغيوم من اعزاء رحلو عن دنيانا
 ربما
ربما
اهداء خاص لصديق / ة
شعرت فى حديثى معها بالانكسار
امل زياده