الاثنين، 18 فبراير، 2013

هو يكذب وهى تتجمل





هو يكذب وهى تتجمل

الموضوع المرة دى كبيير ومهم  وخاص جدا
هبدأ من الاول : شاب نوى يتجوز
كلم والدته تدور على عروسة واخيرا لقت واحده بنت ناس وصغيرة ودبرو مقابله وحصل القبول والموافقه ثم اعلان الخطبه والزواج

لحد هنا وكله عادى  وبيحصل كتيير
طيب تعالو بقا نقارن طوال فترة الخطوبه الطرفين يعيشوا اجمل لحظات العمر وكان اللحظات دى مش موجوده او  متاحه بس للخطيبين

فطول الوقت هو يكذب وهى تتجمل وتكبر الجمجمة من منطلق جوزك على ما تعودية !
وبعد الجواز الصدمة
ايه ده شخصية مختلفة تماما وبدأ الاناء ينضح بما فيه من عقد نفسية وفهم للرجولة غلط حتى كلمة الف سلامه مفيش
وكأن الرقة والذوق حكر على فترة الخطوبة ؟
ليه التحول ده  مش عارفه
ليه تسخيف الاراء والمشى بدماغه وكأنه العالم ببواطن الامور ولما تتكلم  يقول انا اكتر خبرة
طيب هى الخبرة دى بتتقيم ازاى  ماهو ممكن تكون كبير فى السن ورصيدك من الخبرة زيرو ولا هو من منطلق انا الراجل ابقى صح ؟
حتى التغير بيظهر فى حاجات بسيطه نفس الحاجات اللى كانت بتعملها ايام الخطوبة نفس الاكل
يمكن كمان نفس العطر نفس الاهتمام به والمفاجأة من رد فعلة مسببا صدمة كبيرة للزوجه لما تلاقى الزوج مكشر وكأنه لو ضحك مثلا هيمرض
وفجأة الاكل وحش ايه اللى انتى عاملاه ده
ابوكى قال  بعد ما كان ( باباكى وادامه حضرتك يا عمى )
امك قالت اخوكى عمل
وتلاقى انك قاعده تبررى وتدافعى كأنك فى قفص اتهام
وطبعا  يمكن لو سكتنا شوية كمان نكتشف ان الست هى سبب  ازمة البنزين ويمكن كمان ارتفاع الاسعار والحرب على العراق
تقول الزوجه يمكن لما يكون فى نونو الوضع هيختلف
لكن العكس هو الصحيح لان انشغالها بالضيف الجديد يجننه
وطبعا تبدأ مرحلة جديدة من الاكتشافات النفسية العميقة للزوج
والعجيب لما تتكلم مع والدته وتشكى لها سوء طباع ابنها تضحك بخبث وكأنها شمتانه فىها وببساطة تقولك اصله زى اللى خلفه
طيب انا ذنبى ايه فى ان ابوه كان بيعاملك وحش مثلا
وكأن الزوج ينفث عن عقد طفولته مع الزوجة والاولاد
هو لازم الزوج يبقى صورة من الاب والبنت صورة من الام
ممكن اكون صورة منهم بس اخد اجمل ما فيهم
ماهو لا هما ولا احنا ملايكة
لا وكمان يقولك درر
انا كنت بشتغل طول عمرى وانا صغير منذ الطفولة ولازم ولادى يبقوا رجالة زى ابوهم
طيب زمان كان حاجة ودلوقتى حاجه
يعنى بنت ولا ولد فى سنه سته ابتدائى تشتغل ايه وفين ؟
ومين اساساً هسيسيبه يعمل كده لالا كده اوفر الحقيقة
الاولاد خط احمر واصفر واخضر وبنفسجى واسود على كل ظالم ومعقد نفسياً
الخلاصة  الرجل بعد الزواج
بيحمل الزوجه فوق طاقتها انا اعرف رجال ميعرفوش اولادهم فى اى سنه دراسية رغم انه موجود ضيف فى لوكاندة المنزل قصدى البيت اللى بالنسبه له لوكانده
!!!!!
ده كان نموذج اولى
النموذج الاخر مصيبة من مصايب الزمن
تزوجوا بعد قصة حب
عرفو بعض عن طريق الشغل
المسار التقليدى للعلاقة  ارتياح
نظرات ، ترقب ، ابتسامة ، لقاء ، خطوبة ، زواج

ياااااااااااااااه  منتهى السعادة الزواج عن حب
ده اختيار الطرفين
طبعاً  طبعا محدش يقدر يعترض

لكن لا لحظة من فضلك عزيزى الرجل
يبدو ان التركيبة  النفسية واحده
الزوجه حالمة فاكرة انه هيفضل لطيف ده على طول
لالا انتى بتحلمى
ده لو مصرغلبت الجزائر و وصلت كأس العالم هو يتغير
بعد الجواز
نفس السيناريو
انتى فيك كذا وكذا ، اهلك قالو
وكانه ملاك هو وعيلته
!!!!!!!!
ومفيش مانع شوية تسخين من صديق سيء او فاشل اسرياً ً
او من امه او اخته
وتبدأ نبرة الصوت تعلى
وهات يا سب في الدهر والزمن اللى وقعها فى سكته
ويلعن حظه التعس
ولما تسكت الزوجه وهى بتغلي
يتجنن اكتر ويتطور الامر لخناق وضرب وسباب ليها وللى خلفوها كمان
وطبعا هى لا حول لها ولا قوة لاننا فى مجتمع يغفر للزوجه اى شىء الا الطلاق تظل موصومة به طيلة عمرها حتى لو كان مجني عليها وتظل منبوذه حتى من اقرب المقربين لان لعنة الطلاق  طالتها وطالة اولادها
انا اعرف سيدة زوجها حدفها بكرسى فى وشها لما كسر لها عظام الانف وفضلت فى المستشفى حوالى خمس ايام تتعالج
وكمان  فى زوج مريض الله يحرقة بجاز
لما بتتأخر عند امها  لحد الساعة 9 مساءاً يتصل بيها
انتى فين ؟ لسه هناك طيب
ترجع بسرعة لبيتها تلاقى الحاكم بأمر الله منتظر
اول ما تدخل البيت الجيران يسمعو ا شتيمته ليها وكأن بيكلم عاهرة
ومش مكسوف من ابنه وبنته
ولا من الجيران ولانها مش ترد يقوم ضاربها وواخد العيال وطارداها من البيت وقافلبالمفتاح  ويقولها روحى لعندهم
******
ولما بقولها ليه مستحملة ترد باكية  علشان ابنى وبنتى وبنتى اكتر والله والله ابنى اتعقد
بنتى بتقول هو ليه بابا مش بيضحك؟
لو لقيته ضربك تانى  هضربة بالازازه على دماغه
يارب يسافر وميرجعشى ؟
وابنى لما بيكون عايز حاجه بيطلبها منى وانا اطلبها من اخويا لانى لا اجرؤ على انى اطلب منه حاجه حتى الموبايل اللى جالى هدية كسره
تليفون البيت كسره كمان لانه مش بيحب يتصل ويلاقى التليفون مشغول
والله يا مدام  انا بضرب فى البيت ده اكتر من العيال
قلت لها قولى لاخوة او لامه
تقولى امه بتقول لى
احنا عارفين انه مجنون ؟
****************
السؤال
دى تبقى عيشة
ذنبها ايه  البنت والولد
والزوجه هل اخطأ لما اختارت انها تتزوج عن طريق القلب ؟
ماهى لو كانت تعرف انه كده استحالة كانت هتوافق ؟
طيب نعرف ازاى ؟
والاهل يعملو ايه علشان يحسنو اختيار ازواج لبناتهم؟
هو الرجل بيتجوز منظر اجتماعي مثلا ؟
ومع الوقت تبدأ عقده النفسية فى الظهور ؟
كده لازواج صالونات ناجح ولا زواج عن حب نافع يبقا ايه العمل وفين الحل ؟
ليه الزوج بيستغل ضعف وصمت الزوجه وصبرها على تحمل سوء طباعة
لدرجة انها تتمنى موته
ولا تملك قرار الانفصال
لان لديها اولاد وليس لها مصدر رزق ولا سكن واحنا فى زمن محدش بيستحمل حد ؟
وللحديث بقية 

هناك 3 تعليقات:

faroukfahmy58 يقول...

وســــــــــــــام
مع انى رجل ولكن اقسم بان كل كلمة سطرتيها صادفت واقعها المر وانا لااتهم نفسى بنفس السلوك وان كنت بعيدا عنه كل البعد ولكن اتهم عينى بما تراه و فى معظم حياة الآخرين لدرجة ان البعض اتهم الزواج بانه ظاهرة اجتماعية فاشلة
اوصانا ديننا بالمرأة خيرا وجعل المودة والرحمة طريقنا الى دوام حبها فلماذا ننكر ونتنكر لها كل هذا السلوك !!!!!!!!!!!!!!!!!!!!!!!!!
الفاروق

wessam يقول...

اشكرك استاذى على مرورك الكريم واتمنى فعلا ان الرجل والازواج يقدرو نعمة الزواج وان مادام فى اولاد يبقى لازم نتريث ونتحكم فى عصبيتنا

wessam يقول...

اشكرك استاذى على مرورك الكريم مع الاسف الشديد دى نماذج حقيقة والبيوت ياما فيها ربنا يهدى الاحوال ويصلحه
المشكله ان فى اولاد ليس لهم ذنب فيما يحدث بين والديهم