الجمعة، 1 مارس، 2013

فى زمن الاخوان


 

فى زمن الاخوان

فقط فى زمن الاخوان يحدث الشىء وعكسه

فى زمن الاخوان تخرج  مظاهرات تؤيد النظام رغم انه من يملك زمام الامور فى البلاد

يحدث فى مصر فقط وفى زمن الاخوان تحديدا
ان وصل المصريين لكره القضية الفلسطنية وتنحت القضية جانباً واصبح شغل المصريين الشاغل يا ترى بكرة فى ايه ؟
فى مصر فقط كل يوم حديث جديد  وحدث اجدد يشغل الرأى العام والاعلام ويتناوله المصريون بخفة دم كالمعتاد
فى زمن الاخوان فقط يتم   صدور قرارات  جمهورية الساعة 12 مساءاً وتلغى بعدها بساعتين
فى زمن الاخوان فقط يصدر الرئيس قرارات ويتراجع فيها بعد عدة ساعات
فى زمن الاخوان  يخرج الرئيس كى يلقى خطبة ارتجالية  لعدة ساعات  وكاننا امام امام مسجد مثلا
والخلاصة من الحديث المطول ان مصر تمام والامن ميه ميه
فى زمن الاخوان  فقط
الحكومة تقول ان مفيش مشاكل  رغم ان البلاد كلها اضطربات واعتصامات
فى زمن الاخوان فقط
كل كارثة تنسب للنظام السابق والدولة العميقة
فى زمن الاخوان فقط
تستخدم القنوات الدينية منابرها لتكفير هذا وذاك واباحة دم هذا لانه يهدد الشرعية
فى زمن الاخوان
حدثت مجزرة يوم الاربعاء الدامى وسط تكبيرات وادعية حماسية للجهاد
فى زمن الاخوان فقط
انقسم الشعب بين اخوان ينساقون وراء مرشدهم وبين اخوان  مصريين يحلمون بحكم دولة الاسلام
وبين اخوان وطنيون عصروا على نفسهم ليمون حتى لا يصل للكرسى اذناب النظام السابق والضحية الفقير
فى زمن الاخوان فقط
يهان الرجل ويسحل ويتعرى ويطلع يشكر فى ضباط الداخلية ثم تكتشف القنوات الدينيه انه من اسفين ياريس وفجأة انه هو من نزع ملابسه وتعرى  بارداته  من اجل رغبة ما  (والله قالو كده )
فى زمن الاخوان فقط
ممكن تلاقى شيخ ملتحى وفى قناة شهيرة  لها ثقلها يقولك الست بتربى حيوانات بديلة للزوج
فى زمن الاخوان فقط
الطماطم تبقى بجنيه وجنية ونص والبصل بخمسه جنيه والفاصوليا بسبعه وثمانية جنيه بس المانجا بخمسه جنيه 
فى زمن الاخوان فقط
الناس تروح تدفن  اولادهم ينضرب عليهم نار
فى زمن الاخوان فقط
يحصل خطف لكل النشطاء وتعذيبهم وبعدين اللى له عمر يرموه فى الشارع محطم الاضلاع واخر مقتول
فى زمن الاخوان فقط
تضرب النساء وتهان بكل الاشكال
وينظر لها فقط من ناحية واحده بس كانها اناء لتفريغ رغبات الرجل  وكان هذا الكائن الاخوانى
مكنش له ام وزوجه واخت
وانه لولا والدته ماكنش  شفنا وشه
فى زمن الاخوان فقط
يتم تعيين كل من تعاون مع الرئيس بشكل مباشر او غير مباشر فى حملته الانتخابية
ولما تتكلم وتقول ما ينفعشى يقولك
ماهو مبارك كان كده واكتر
طيب مبارك كان بيعمل كده قبل الثورة والناس هاجت علشان كده علشان الفساد والمحسوبية
يقولك بس مرسى مش حرامى
فى زمن الاخوان بس
تلاقى كل القنوات فى وادى وقناة 25 فى وادى تانى خالص  وتلعب نفس الدور المحرض اللى كانت بتلعبة قناة الجزيرة اثناء الثورة وما بعدهااثناء فترة حكم العسكر
وفاكرين لما العسكر فضوا الاعتصام بالقوة وفجأة طلعت منقبة معتصمة تقول دول كفرة حرقوا المصحف
فى زمن الاخوان فقط
الشعب عمل توكيلات للجيش فى الشهر العقاري بادارة شئون البلاد
فى زمن الاخوان فقط
الست ام ايمن  بتقول ان خيم المعتصمين تمارس فيها الرذيلة


فى زمن الاخوان فقط تترك قناة التت  وتفتح قنوات رقص جديدة وتغلق قنوات المعارضة او الفلول كما يقولون
دريم والفراعيين
فى زمن الاخوان بس

بالصدفة البحته يتم قتل كل من عمل صفحة مناهضه ليهم
فى زمن الاخوان بس
تظهر شائعات لست ادرى ما مدى صحتها  من كذبها
مثل مشروع قطر لتنمية مدن القناة او لتأجير الاثار المصرية
كل ده واكتر مبيحصلشى الا فى زمن الاخوان
*************** 

ليست هناك تعليقات: