السبت، 5 مايو، 2012

مالهاش حل تانى *_^

انا من هنا انت منين ؟

ده انعكاس  مصر فى المرآة

لما تصحى الصبح  وتفتح الحنفيه وماتلاقى مياه  عادى جدا ما تحرق دمك اصل الصيف هل بمشاكله 
لما تبقى فى الشارع وتلاقى الكل بقى محلل سياسى  استمع باهتمام والا ستكون خاين وعميل 
لما تروح ميدان التحرير وعلشان تدخل الميدان او تمر منه لازم تعلق اجبارى صورة لابو اسماعيل تأكد ان انصاره مخلصين ومسحوريين 
وياريت تاخد الصوره ومثل انك سلفى
لما يبقى لك مصلحه فى المجمع وعلشان تنجزها تاخد حوالى ساعتين علشان تدخل المجمع نفسه تأكد ان فى اعتصام سلمى  وقافلين الميدان
ولما تلاقى اختلاف بين عيلتين وتعبيرا عن احتجاجهم وغضبهم قطعوا خط السكه الحديد اتأكد انك اكيد فى مصر
لما تبقى عايش اكثر من 30 سنه ومحدش يسمع لك صوت وبعدين تتمنى ان يسكت الجميع يبقى اعرف انك قمت بثوره
والكل بيتكلم فى وقت واحد

لما تسمع خطب عصماء ووعود مثاليه بانجازات حازمه تأكد انك بتسمع مرشحى الرئاسه 
لما تبقى متأكد اللى هيفوز فى مارثون الرياسه فولان تأكد ان الشمس لو طلعت بليل هو هيفوز لان للمجلس مقاييس اخرى
لما تلاقى فى ثوره فى البلد واطاحت برأس النظام ومع ذلك وزيره مرشح لنفس المنصب اطمن خالص  بتحصل بس فى مصر بس
لما تبقى مصرى والكل بيحسدك على جنسيتك لانك صاحب حضاره من 7 الاف سنه ورغم ذلك مهان تأكد ان اكيد منها
لما تبقى مسافر لخارج مصر وتلاقى كل النصائح  محصورة فى خد بالك من نفسك خليك جنب الحيط ولو ينفع تمشى جوا الحيط  امشى لان مصر عمرها مابتجيب حق حد خصوصا بره يبقى اتأكد انك من مصر
لما تفتح التليفزيون وتلاقى فيلم شفته قبل كده مليون مره وتقرر تشوفه ويطلعو فاصل اعلانى اكتر من مدة الفيلم نفسه يبقى تأكد انك بتشوف قنوات عربيه
تنسيك حتى انت كنت بتشوف ايه
لما تكره اى احد متأسلم او متأدين  يبقى اكيد اكيد فى مصر
لما تلاقى تيار بعينه  عايز يقفز على اى  منصب والسلام ويقولك كلام جاهلى اتأكد انه مدعى وغيرصادق ومش موجود الا فى مصر بس 
لما حد يقولك مضاجعة الوداع وتخفيض سن الزواج قله لامؤاخذه ......... حمرا !
لما تحصل كارثه دمويه تاكد ان ماس ومعتوه من فلول النظام السابق عادو تانى بس متنكرين فى صورة ثوره مضاده او طرف ثالث  ..*_^
ورغم كل ده 
دائماً هناك وجه مشرق للامور
لما تصحى الصبح وتلاقى نفسك لسه على قيد الحياه احمد ربنا  انك لسه عايش فى البلد دى وانها كتر خيرها مستحملااك  ده اعجاز فى حد ذاته
طبعا لو حصل كل اللى فات ده اعرف واتأكد انك فعلا مصرى وعايش فى مصر
بقولكم ايه
صباح الخيييييييييير
أمل زياده

ليست هناك تعليقات: