الأحد، 11 مارس، 2012

مصر بعيونهم 1

       
                                                                      
                          أنس  رفعت                      
                                 
                     كاتب قصصى  

                                               
صاحب كتاب /  الناس حكايات
واصغر مدون

ترى كيف سنرى مصر بعيونه

الاول اسمك ووظيفتك  او مؤهلك
أنس رفعت.. طالب في تانية ثانوي.. مدون وكاتب على موقع الباشــ مدون
بصفتك مصرى   كيف ترى مصر بعد الثورة ؟
في البداية الموضوع كان زي ليل طويل.. وفجأة طلعت شمس محدش كان متوقعها.. أنا كنت شايف الثورة في البداية ثورة أمل.. وكلنا كان عندنا كمية من البراءة والحلم إن الثورة دي تغير كل حاجة..
بس للآسف ديماً " روعة البدايات لا تدوم " .. دخلنا في واقع ممل بكل ما فيه من أحداث وقتل وخناقات واختلافات وعك من القوي السياسية..
الموضوع عامل زي ما اتنين يتجوزوا.. ويبقوا فرحانين أوي في شهر العسل.. وبعدين يبتدوا يعيشوا في واقع ومسئوليات ما بعد الجواز.. بس دا مش معناه ان الثورة ضاعت أو ماتت.. بس بقيت أكثر واقعية شوية..
كيف تابعت وقائع الثورة ؟ هل كنت تتوقع ان  الشعب سيثور ؟
زي ما قلت لحضرتك.. الثورة زي شمس محدش كان متوقع طلوعها.. بس التشبيه نفس، بيأكد ان حدوث الثورة كان حتمي وطبيعي.. لازم الشمس تطلع.. ولازم الاسطورة الكاذبة بتاعت ان المصري لا يعيش إلا مع الاستبداد تنتهي..
تابعت الثورة، بهزار يوم التلات 25 يناير.. كل ما اقابل حد: دا انهاردة في ثورة زي تونس..
بعد كدة الموضوع قلب بجد يوم الخميس بليل، ويوم جمعة الغضب بقى جد أكتر..
وفجأة حياتنا بقت مجرد نوم وصحاين.. وقعدة قدام التليفزيون علي قنوات الأخبار.. ولما النت رجع قدام النت..
فكرت اني انزل التحرير، وكنت خدت القرار خلاص.. وكنت نازل يوم الجمعة 11 فبراير.. بس والدي رفض، ويومها بليل مبارك اتنحي..
اوصف شعورك وانت تتابع تداعيات الاحداث  فى مصر خلال 18 يوم ؟
دا أصعب سؤال علي فكرة.. مكنتش عارف اوصفه وقتها، لأن كلنا كنا جوا المشهد.. مؤثرين ومتأثرين بالي بيحصل.. ومكناش مدركين أبعاد الي بيحصل ..
ودلوقتي.. فقدنا روعة الحدث، وبقى واقعي زيادة عن اللزوم.. وطلعنا كلنا برة المشهد..
حاجة كدة زي فيلم جميل، فيه لحظات فرح وشجن وأغاني وجدال ونقاش.. كل ما حد يفكرك بالفيلم بتفتكر احساسك وقتها.. بس الاحساس دا أصعب من انك توصفه..

هل اختلفت مصر الان  او بمعنى اصح هل لمست  اختلاف  فى مصر بعد الثورة ؟
آه طبعاً اختلفت.. بس المشكلة اننا خدنا الحد الأدني من النجاح.. مش كله
المشوار لسة طويل أوي..
بس لو رجعنا بينا التاريخ ، حتمنى ان الثورة دي تتكرر مليون مرة

اوصف لنا حال مصر وانت شاب فى عصر المخلوع ؟
فساد ، رشوة ، استبداد ، تعذيب في السجون ، مصالح ، فقر ، أمراض.. تزوير انتخابات.. احباط وبئس علي وشوش الناس
اننا نشوف حلقة من أي برنامج توك شو قبل الثورة.. الحياة اليوم ولا العاشرة مساءاً .. حنعرف اننا كنا عايشين ، سوري يعنى.. في مزبلة ..

افكار للاصلاح  ماذا يجول فى خاطرك من فكر للاصلاح عسى ان ينتبه لنا مسؤل او اياً ممن يهتمون لامر البلاد
اصلاح التعليم أولاً وأخيراً .. أي حضارة في العالم، عمرها ما حتقوم من غير العنصر البشري.. الثروة البشرية أهم وأعظم من الثروات المادية.. وهي الي بتوجدها، وبتأثر وبتستفيد بيها..
زائد إن كل حد موهوب ومتميز في حاجة، يعملها.. نحط الشخص الصح في المكان الصح
دا طريق واضح معالمه.. بس مهواش طريق  سهل . والأولى ان الي يتكلموا في تنفيذه هما مجلس الشعب الي الناس اختاروه.. والحكومة الي المفروض تكون من أغلبية مجلس الشعب.. ورئيس الجمهورية الي الناس حتختاره..
اسمحيلي .. مبقاش ينفع سؤال ( ينتبه له المسئول ) ..
المسئول مبقاش سيادته وحضرته.. دا واحد شغال عند الشعب.. ودا دوره .. يا ينفذه ، يا اما يقعد في بيتهم.. الموضوع بقى تكليف مش تشريف..

ايه رأيك فى  الاخوان/ مصريين قبل أي حاجة.. وناس لعبوها سياسة من أول الثورة.. وأغلبية الناس اختارتهم.. بس المشكلة ان كتير من سياستهم مش واضحة.. فالبعض بيتهمهم انهم ببيلعبوا في الضلمة .. وإن كنت أنا ضد الاتهام دا
القضاء المصرى / زي أي مؤسسة في مصر.. محتاج اصلاح وتطهير..
جهاز الشرطه/ لازم يفهموا ان مفيش اختيار بين الحرية والأمن.. وحفظهم للأمن مش محتاج أي مخالفة للقانون أو تعدي علي حق من حقوق المواطنين.. عقليات ناس كتير منهم لازم تتغير.
المجلس العسكرى/  من غير سبب معروف.. لبسوا هدوم مبارك بعد ما مشي.. عن قصد، أو غير قصد ... مجلس شيوخ ، ومكنش ينفع ان هما الي يمسكوا السلطة بعد ثورة شباب
امريكيا وسياستها / ناس بتدور علي مصلحتهم أولاً وأخيراً
 ايران كقوى   بدأت  فى التعامل بجراءه فى الاونه الاخيره /  ناس بتدور علي مصلحتها بردو
الجمعيات الاهليه  واتهامها فى مصر بالتمويل الاجنبى / مصر كلها بتتمول من الخارج.. واثبتوا ان الخرائط الي لقوها، بتاعت الانتخابات الي نزلت من موقع لجنة الانتخابات المصرية.. مش مفهوم ازاي الجيش ياخد تمويل من كل دول العالم.. وأما شباب يروحوا يتعلموا ازاي يعملوا حملة انتخابية أو مظاهرة أو مش عارف ايه ..
تبقى هي دي المصيبة !!
سفر الامريكيان بهذه الطريقه / عدم احترام من الإدارة السياسية المتمثلة في المجلس العسكري.. لعامة الشعب..
اسرائيل / ناس بتدور علي مصلحتهم بردو ..
البلطجه  كظاهره تفشت فى المجتمع فى اعقاب الثورة / لا تفشت ولا حاجة .. المجتمع المصري مجتمع خصب لنمو البلطجة والاجرام .. مع احتمال انها تكون مدفوعة من فلول الحزب الوطني..
عامة البلطجة ظاهرة .. حلوا اصل المشكلة.. ومش حتتواجد أعراضها اصلاً
احداث بورسعيد / الحقايق مش معروفة.. بس بيتهيألي انه كان انتقام من الألتراس
شبح الفتنه الطائفيه / حدوث الفتنة مش بس بين مسلمين ومسحيين.. اي عملية تقسيم لكيان واحد لحاجتين.. كل واحدة منهم ضد التانية ( علماني وإسلامي ) (يميني ويساري ) ( مسلمين ومسيحين ) ( صعيدي وقاهري ) .. وحتى أتفه الحاجات .. ( أهلاوي وزملكاوي ) .. ( بيسمع عمرو دياب.. بيسمع تامر حسني ) ..
عملية التقسيم دي .. وان كل واحد يفكر في التاني علي انه عدوه .. ممكن تحدث فتنة ومصايب كبيرة جداً..
الموضوع في الآخر يرجع لمدى تعقل الطرفين.. واحتوائهم لأي مشكلة ممكن تحصل.. وايمانا اننا فعلاً نسيج واحد.. وان اختلافنا دا قوتنا..
الكلام دا قبل ما يكون انشا وكلام بيتكتب في مواضيع التعبير.. لازم يكون عامة الشعب والبسطاء مؤمنين بيه ..
شايف مصر رايحه على فين  ؟ علي رأي جلال عامر الله يرحمه : " قبل ما تركب كنت اسأل" .. قدرنا وقدرها .. في أمل ان الي جاي يكون احسن ان شاء الله .. بس المشوار طويل ..
ازاى نطهر المؤسسات ؟ مش ضروري ان كل الناس تكون عارفة اجابة للسؤال دا.. الضروري ان الشخص المسئول الي الناس تختاره.. يكون عنده اجابة للسؤال دا..
ازاى نطور التعليم ؟ اننا نوجد مدرس عنده الرغبة في انه يعلم.. والطالب الي عنده الرغبة انه يتعلم ..
لازم يكون المدرس موهوب .. ومدير المدرسة موهوب.. المناهج تتحط بطرق تحترم عقلية الطلبة.. زائد اننا نوفر الحد الأدني من الامكانيات اللازمة لعملية تعليمية سليمة ..
فلوس التعليم.. تتصرف ع التعليم. .بس .. مش في جيوب وكلاء الوزارة ومش عارف مين ..
هل فعلا الحرية والعداله الوجه الاخر للحزب الوطنى ؟ منقدرش ومينفعش نقول كدة ..
ليهم ممارسات سياسية مستفزة في مجلس الشعب اه ..
بس أولاً .. الشعب مختارهم بأغلبية
ثانياً .. لا يوجد أدني شك في نزاهتهم و أخلاقهم ..
الفكرة في الأداء السياسي بتاعهم والانجازات الي حيحققوها..
والاجابة عشان تكون اجابة منصفة.. لازم نجاوبها بعد سنة أو اتنين .. أو يمكن مع الانتخابات الجاية..
والشعب هو الي حيجاوب كمان..
آخر حاجة أحب أقولها :
شكراً لحضرتك جداً علي الفرصة دي ..
وعلي المساحة الي منحتهالي اعبر بيها عن رأيي ..
مقدر دا جداً.. وعاجز عن الشكر ..


ليست هناك تعليقات: