الثلاثاء، 20 نوفمبر 2012

اكره واتعجب واحب !!



اعترافات كاتبة مجنونه ومخنوقة



اقر وانا بكامل قواى العقلية انى

اكره الكذب لو كذب شخص على مرة واحده تنطبع فى ذاكرتى كاذب مهما قال  ولو كان صادقاً  لا اصدقة  لا اثق بكاذب قط

اكره  عندما اكون ذاهبة للنوم بعد يوم شااااااق ومرهق  اجد نور ابنى يقولى ماما عايز اتعشى !
طيب ماانا قدامك من بدرى  طيب اعملك بيض وجبنة ومربى ولانشون وجبنى رومى  
اه وياريت البيض يكون شكشوكة وبطاطس محمرة ( طبعا بصل وزيت والشقه يبقى ريحتها اكل   والجو ده وبعد ما كنت داخله انام ارجع تانى للبصل والسكينة   وما يتبع العشاء من غسيل الاطباق ثم  اجد زوجى العزيز بعدها بشويه رجع من الشغل لقانى بغسل الاطباق يقولى بتعجب واندهاااااااااااش بتعملى ايه ؟

اكره  شيل شمس كل يوم من الصاله لغرفته وسريرة علشان ينام اصل جنابه بينام على روحه فى اى حته
اكره جدا لما امى تتصل بيا  بمجرد عودتى للبيت وتسألنى السؤال الروتينى انتى جيتى ؟
وهات يا رغي  رغم انها عارفه ان الوقت ضيق ووريا غداء   وتظبيط الشقه  ولو كنا فى انتظار  مدرس ده موال تانى وطبعا اتحرق اقاطعها وهى مسترسلة فى الموضوع شفتى زوجة اخوكى عملت ايه شفتى اخوكى اللى ما اتجوز هبب ايه  امتى يتجوز بقا ولا الواد بتاع المكواه  كل شوية يجى ولا خالتلك بقيت تنسى بتحكى القصة عشرين مرة ولا ولا ولا .... وفى الاخر تقولى انتى ليه مش بتردى ؟
اقول لها : لا ابدا بسمعك .........ز تكمل ونقفل وقبل النوم مكالمة كمان وتقولى انتى ليه بتردى على  الاد كده اقول لها  : لا يا امى بس  كان ورايا حاجات كتيير وكنت بكلمك وانا بفكر انجزهم ازاى بسرعة وفى حاجات كنت بعملها وانا بكلمك  
ترد بتلقائية طيب مش تقولى علشان مش اطول وتانى يوم نفس الحكاية  بس هعمل ايه ربنا يخليها  دى ست الكل

اكره جداً ان كل ما ازور حماتى فجأه كده امراض الدنيا تصيبها 
صدااااااااااع مش عايز يروح الضغط عالى  ضهرى ركبى  وكانى بفكرها بالمرض !!!!!11

  • اكره الشعارات الرنانه  التى تطلقها اخت زوجى كلما تقابلنا وكانها هى الوحيده الوطنية والمصرية واحنا عملاء وبعدين لما تتضايق تثور وتقولك حكومتك حرامية بلدك كلها حراميه وفجأه تتخلى عن مصريتها لو حد   عاملها وحش او لم يستجب لمطلب من مطالبها !!
  • اكره جدا لما ازور اخي فى بيته ولا يجلس معنا لانه كل شويه رايح جاى على المطبخ لدرجة انى بقول له نيجى المطبخ احسن علشان مانتعبه من كتر ما بيضيافنا  ناقص يجيب التلاجه فى ايده كريم بجد بس انا بيكون نفسى اتكلم معاه مش رايحه اكل يا كبيير
  • اكره لما  يكون ورايا شغل ولازم اخلصه ضرورى على الجهاز والاقى نور  واقف ورايا وبيقول لى  خلصى انا عايز اقعد
  • كل لحظة ومع كل نفس يكرر الجمله لما ازهق منه واسيب الجهاز يقعد وهو منتصر
  • اكره لما افتح الحنفية والاقى مش فيها مياه احساس يجنن
  • اكره جدا لما  افتح الجهاز واكون محتاجه انى ابعت ميل للشغل والاقى النت فاصل
  • بتجنن من شمس لما يكون وراه واجب وقاعد يلعب وكل لحظة اقول له اكتب الواجب الاول والعب وما يسمع الكلام ولما ازهق منه واسيبه او او اقول له العب الاقيه ساب اللعب وقعد يكتب الواجب لان اليوم خلص وقرب ميعاد النوم وهو خايف من مدرستة فبيقعد يكتب الواجب بكل همة ونشاط

  • اتجنن لما اقعد احكى لزوجى عن حاجه او موضوع هام  او مشكلة كبيره وابص فى وشه الاقى تعابير جامده   كده مش ليها معنى
  • اكره زوجى عندما يختلق المشاكل ويثور لاتفه الاسباب
  • اكره ان اراه بيهزر مع  شمس لان فى الغالب بيقلب جد لان هزاره هزار صعايده ولازم يقلب بخناقه بجد
  • اكره ان الجأ لابى فى مشكله او لاخذ مشورة منه وبعد ما احكى له بالتفصيل عن الموضوع يقول لى ببساطة لكى زوج هو المسؤل خليه يحل لك مشاكلك !
  • اكره  لما اتناقش مع اخى الذى خطب عشر مرات وفشل ولما نتناقش فى هذا الامر يقسم ان الخطأ ليس منه وانه برىء واننا نتجنى عليه والعشر بنات هما المخطئين ملاك هو
  • اكره مدرسة شمس عندما يقولون لى ممنوع الدخول  رغم انى  بكون موجوده بعد الساعه 12 زى ما بيقولو  لكن بردو ممنوع دخول اولياء الامور اصلى غاوية انى اروح اتخانق معاهم فراغ بعيد عنكم مش لا سمح الله رايحه لان المدرسه  فيها مشكله  زى مثلا انهم كاتبين اسمه فى الاوراق غلط او انه لسه الى الان لم يستلم كتب اللغات لان المدرسه لسه ما  رسيت عليها المناقصه الخاصه بالكتب رغم انهم اخدوا المصاريف كامله
للحديث بقية 

هناك تعليق واحد:

mena moon يقول...

يااااااااااه يا وسام ده انتى شايله ومعبيه طب والله صعبتى عليا

ووش كده قفلت من الجواز والعيال

الله يكون في عونك بس معلش مفيش حد في الدنيا مرتاح كلنا لازم يكون عندنا شويه حاجات كده تعكر صفونا

بس في مقابل كده بتشوفى ضحكت ولادك بالدنيا وماما وبابا ربنا يطولك في عمرهم حتى لو كانو بيضيقوكي شويه
بردو وجودهم ليه طعم تاني اسألنى انا غياب بابا لخبطلي حياتى خالص

وبعدين ربنا سبحانه وتعالى قال في كتابه الكريم (لَقَدْ خَلَقْنَا الإِنْسَانَ فِي كَبَدٍ)

انا طبعا مش بقلل من من تعبك بالعكس ده انتى الله يكون في عونك انا لو مكانك كنت صوت ولميت الناس عليا من المهرجان اللى انت فيه ده بس انا بحاول اهونا عليكيي شويه ربنا يريح بالك