الثلاثاء، 27 نوفمبر 2012

احب اتعجب اكره

اكره التعامل مع الموظفين فى المحاكم واكره تعامل المحامين مع  المواطنين

اكرة المستشار اللى بيستظرف وفاكر نفسه لسه مراهق لما يصدق يلاقى محامية وهات    يا تعليقات سخيفه زيه  زى يا سلام  يوم جميل نظرا لوجهك الصبوح او يوم جميل لانى شفت ابتسامتك ولا المحكمه النهارده شكلها مختلف يا ترى ليه ؟  

اكره العميل اللى مش بيدفع باقى اتعابه بعد صدور الحكم لصالحه طبعاً
اكره رائحة المكاتب فى المحكمه

اكرة التراب جداً فى اى مكان سواء فى الشارع او على الارفف او فوق الكتب 
اكره جارتنا لانها متقلبة المزاج  يوم تقابلنى بابتسامة لدرجة انى اقول لنفسى دى اكيد مريضه  ومرة تانيه ناقص تقذفنى بشنطتها لانها شافتنى الصبح 
اكره وكالة انباء العمارة جارتنا التى تسكن الطابع الرابع  لو قابلتها مرة  ما تسيبنى الا لما تعرفنى اخبار العمارة والعمارات المجاورة وهى تحكى وانا اشيل ذنوب
اتعجب جدا لما اعزم حماتى او اخت زوجى فى رمضان او اى يوم عادى وهما اللى يختارو نوع الاكل وكانهم فى مطعم مثلاً  رغم انى لو  لا سمح  الله اتعزمت عندهم ودى بتكون مرااااات نادرة كده زى العنقاء والخل الوفي بيرفعوا شعار الجوده من الموجود !
اكره انهم يطبوا علينا فى اى وقت ( اهل زوجى )  دون مراعاة لظروف او وقت   ممكن تلاقيهم الساعه واحده مساءا بيرنوا الجرس  عادى جداً وطبعا لازم   ياخدو واجبهم  حتى لو كنت فى سابع نومه دول ضيوف ولما تيجي تزور حد فيهم لازم تحجز قبلها اصل الاصول بتقول كده !

اكره اى حد يقول قال الله وقال الرسول مادام قال كده تاكد انه كذاب ومنافق ومش بعيد يكون  حرامى كمان

اكره ان الناس تصنفك  بناء على حوار او على ابداء رايك فى حدث معين
اكره النظرة الغير موضوعية للامور زى مثلا   تجاهل ذكر مبارك فى كتب التاريخ  وتجاهل  ناصر والسادات  والملك  فاروق لا اكتب انهم حكموا من الفترة كذا الى كذا واخطاءوا فى كذا وافسدوا فى كذا ، التجاهل مش هو الحل لا هو اللى هيرضي الشعب ولا هيطلع جيل فاهم  ابداً

اكرة الفاظ فلول نخبة  سلفيين ليبراليين اشتراكيين ثورة   علمانيين اخوان طبعا
لان كل واحد بيسمع نفسه فقط
اكرة تكفير الناس  واباحة دماءهم  واكره الحجر على الفكر وزرع الفتن  من تكون انت حتى تكفر هذا او تسب هذا لنا خالق هو اعلم بالقلوب وما فيها وهو الوحيد الذى يحاسبنا  انت بشر مثلك مثلنا وارد انك تخطىء  اكثر من انك تصيب

مش عارفه الحقيقه حقيقة هذا المعتقد الذكورى ان الاوقات الحميمه بتكون بعد اى جنازة او مصيبة او كارثه مختلفة او انسب وقت ليها !!!!!!!!! طيب ازاى  مش فى نفسيات مدمرة  يعنى بعد مشاهد البكاء   والحزن   ممكن يحصل كده اشك 

اكره اووى المنظرة والمزايده بالكلام وادعاء الوطنية 
اكره اووى المتاجره بالشهداء   تحت اى مسمى واتعجب من هؤلاء القوم هل انتزعت من قلوبهم الرحمه 
الاهالى قلوبهم مفطورة من فقدان اولادهم ودول بيتاجروا بالقضية

اكره اللص الادبى سارق النص الادبى واللى بينسبه لنفسه عادى جدا حتى لو كانت اسطورة مثلا مش مبرر انى انقلها كربونه

اتعجب من زوجى عندما اجده  يستمع الى اغانى  صاخبه شعبية راقصه فى اوقات الازمات مثلا ايام الثورة والبلد بتتحرق ايام  حادثة الاتوبيس فى اسيوط وصور الاهالى وهما بيبحثوا عن اشلاء اولادهم من على القضبان  حاجه توجع القلب وهو بيسمع اغانى راقصه ولا انا اللى اوفر؟
اتعجب من الناموس بعد ما اتفنن فى اصطياده بالمضرب واروح انام وانا سعيده انى  قضيت عليه الاقى واحده سايبه الغرفه كلها وجاية تزن جنب ودانى بتغيظنى اووى وكانها بتطلع لى لسانهاوتقولى انا  اهو  بس هى الناموسه عندها لسان ؟

اتعجب جدا لما الموبايل يرن واكون فى عز الشغل ومش قادرة ارد ولما افضى اتصل باللى كان بيكلمنى الاقيه زعلان منى اصلى بنفض له ؟ من وجهة نظرة او بتعالى من وجهة نظره
اكره اى حد على النت بيتعامل مع البنت او الست على انها شىء مباح  ممكن تقبل منه اى حاجه بامارة ايه بس 

اكره اللى فاكر ان الليبراليه انفتاااااااااااااح  بالمعنى السىء
اتعجب جدا لما الاقى صديق لسه قابله طلب صداقته والاقى منه رساله ممكن رقم تليفونك  ؟ برىء اووى الراجل ده  متفهموش غلط 
ده واحد فالانتينو    طبعا بيكون مصيرة البلوك على طول

اكره الغيره الغير مبررة بين البنات وبين الزوجه واخت الزوج وزوجة الاخ 

اكره الفراغ القاتل اللى بيخلى الناس تجيب سيرة بعض وتروج شائعات

اكره الغمز واللمز على  بعض الكتاب لانهم بيتشاركو الندوات مع اشخاص بعينها

كرهت بالفعل اى حد بذقن او اى شيخ
اتعجب جدا من امى عندما يكون عندى ندوة او صالون ثقافى رغم انى مقله جدا   نظرا لظروف كتيير والاقى امى تؤنبنى قائلة والمدرسة والشغل والعيال لازم اروح شايله الهم

احب اسمع فيروزو  اموت فى صوتها واحلق معاه فوق السحاب
احب اغنية الكبير كبيير  عمرو مصطفى ووائل جسار
احب دكتور نبيل فاروق
كل ما اقابله اتعلم منه حاجه جديده وادرك انه موسوعة علميه ماشيه على قدمين
احب اللعب مع شمس ومرام بنت اخويا ومزاج عندى انى اغلس عليهم علشان اشوف رد فعلهم بيكون تحفه بجد
اهداء خاص للاخت مرام صاحبة كلمة حدوفه
احب المحشى من ايد امى بس
احب خالتى اعتبرها صديقتى انتيمتى رغم انها اكبر من امى سنا لكنها اكثر سعة صدرا منها
كاتمة اسرارى
احب اشوف شمس وهو بيذاكر تطور والله ماسك القلم بصوابعه الصغيره وفارش الكتب كلها علشان هيكتب واجب العربى
ومغطس راسه جوه الكراسه وبيكتب بتركيز  وفى الاخر  يقول لى انا زهقت كل ده هكتبة واكتشف انه كتب كلمتين بس
احب اتكلم مع اخويا الصغير هو مش صغير اووى بس بالنسبه لى صغير صديقي المقرب واثق فى ارائه
احب الشاى والنسكافيه
احب الضحك والناس الرايقه انما المضايقه لالاماليش فى دول على راي  عدوية
احب اقرأ كل حاجه تقع تحت ايدى حتى لو كنت قراتها من قبل

احب اقطع المقالات من الجرايد والمجلات واخليها فى شنطتى وفى اى مكان اطلعهم واقراهم حتى لو مر سنيييين وهما متشالين فى المحفظة فى الشنطه
احب الشتاء ورائحة  المطر
احب الاسماعيليه ونادى المعادى  اعشق المكانين دول جدااااااااا
احب ابطال رواياتى واتخيلهم ناس من دم ولحم
واتمنى وجودهم بينا
احب ايام الامتحانات بتكون   مشحونه لاخر ثانية  شغل
احب اصدقاء البيرف سيادة المستشار وسراج واحمد انور وهبه وايهاب ونيمو وريهام وسميره  وجيجى  ونونا والمرشدى
احب اصدقاء الفيس والبلوجر
 واحترم اصدقاء الشغل لان ليس لى  خيار فى اختيارهم فرضهم الواقع عليا وكذلك جيرانى
احب  اشوف القطة ميشو وشمس مطلع روحها طول النهار وهى عايزة تنام وبعدين  هى تطلع روحنا بليل لما ننام
احب رواية الحرب والسلام واحب مسلسل الحب والخوف ورسائل الحب والحرب
احب  ادهم صبرى واعشق مبادئة اللى اتربينا عليها  واللى بحاول اخلى نور ابنى يتعلق بيها علشان دى ساعدت كتييير فى تكوين شخصيتى
احب ممارسة الرياضة اعشق رياضة التايكندو ليها معايا ذكرياااااااااات جميله اووى
احب ابى وامى وعائلتى الصغيره وعائلتى الكبيره قراء كتاباتى
احب المدينة المنورة ومكه  المكرمة ودولة الامارات 
احب  ارد على التليفون ويكون المتصل اصحاب نور واغلس عليهم واقول هو ضرورى تكلموه مش كان معاكم فى المدرسة انا لو منكم  اتبرأ منه
 وبعدين مش كلمتوه امبارح  واحب اسمع ارتباكهم ورد فعلهم  اللى بيكون يا ضحك يا  سكوت
احب اقرا لانيس منصور والادب العالمى المترجم كله ومسرحيات شكسبير حتى لو قراتهم قبل كده مليووووووووون مره
احب الافلام الاجنبى واكره المسلسلات العربى  والافلام العربى لانها كلها تجارية ونفس الحوار ومن اول ربع ساعه تتوقع النهايه
احب باقة mbc كلها ودبى وان

واحب الممثل كريستيان بال فى فيلم  الاكليكى بام تحفه بجد الفيلم ده لو اتعاد مليون مرة لا اذهق منه واصر ان اولادى يشوفوه  زيه زى الافلام  التى تجسد قصص الادب العالمى مثل كونت دى مونت كريستو او هاملت  او ديفيد كوبرفيلد او توم سوير او توم كروز او كنوز الملك سليمان 
او اى حاجه زيهم

امل زيادة

هناك تعليق واحد:

ضياء عزت يقول...

اتفق معك جدا في كل ما تحبين وتكرهين ومما تتعجبين منه

بالتوفيق دايما