الحب 2011

الحب على الطريقه الحديثه

الحب كان على أيامنا  انك تتنظر بلهفه ظهور الحبيب وتجرى   من الباب للشباك علشان تشوفه  الحب كان انك تسمع اغنيه رومانسيه وتطير معاها وتتخيل انها بتتكلم عنك وعن الحبيب

الحب وقتها كان انك تفضل سهران الليل بترتب فى كلام وتحضره علشان لما تشوف حبيبك تقوله له  واللى طبعا بيتنسى اول ما بتشوفه بيتبخر زى المذاكره  بالضبط

وبالنهار تأنق وحيره فى ماذا ارتدى وكيف ابذل ما بوسعى حتى نطلع متوافقين حتى فى الالوان علشان اقعد واقول اد ايه احنا مناسبين لبعض 

الحب كان ان الولد هو اللى بيجرى وراء البنت علشان يلفت نظرها او يكلمها

 الحب كان خجل وحيره وحاله كده من عدم الاستقرار زلزال بيصيب القلب  وكان دائما  بينتهى بصدمه تزلزل الكيان  وما اكثر من قصص الحب الفاشله سواء بسبب الظروف او بسبب عمرو  ههههههههههههه

تعالو الحب الايام دى  حاجه كده تيك اواى   زى الشاورمه والهامبورجر والكوكولا

 تلاقى الولد يا حرام قاعد فى حاله ومليون بنت بتلف وتدور حواليه  وناقص تروح تشده من هدومه وتقوله افهم يا بنى آدام انا قصدى انت  بمعنى الولد قاعد فى حوش مدرسته  ولا فى النادى ولا حتى بيشترى حاجه من الشارع وتلاقى البنات  مش بنت واحده  رايحه جايه وجايه رايحه  وجايه ورايحه  لما يا  عينى رجلها وجعتها من اللف  وهو ولا هنا  ولما تيـأس خالص تلاقيها تقف وتصرخ زى المجانين ولا تكلم نفسها  ولا حتى تنادى على صحبتها اللى  لصقه فيها  بصوت عالى وصاحبتها ترد بالمثل واخينا قاااااااااااعد ومطنش على الاخر

ده  على ارض الواقع

تعالى بقى على النت  لما تصدق انه يعمل بوست لاى حاجه او حتى لايك تقوم طالعه اون فى كل حاجه  فيس بوك ياهوو سكاى بى وكمان هوت ميل ويا حبذا لو كانت  فى جوجل كمان اى حاجه المهم تقوله انا نورت اهو

وبعدين تتنظر وتقول لازم اتقل هو اللى لازم يبدأ بالكلام  تستنى تلاقيه مطنش تقول لا بقى لازم البدايه من عندى

 تقول له :هاى

هو : هاى

هى : ازيك

هو : كويس 

هى: لقيتك  اون قلت اسلم عليك أصلى مش فاضيه

هو : ليه

هى : ورايا حاجات كتيره اووى

هو: زى ايه مثلا ........ رخم اووى ما تمشيها كده

هى : حاجات كده ماما طالباه منى

هو : يعنى مش الوزاره

هى ههههه لا مش الوازاره وهات يا دش وكلام لما تصدع الواد  وطبعا كلنا عارفين انها مش فاضيه خاالص مش كده ولا ايه

 الخلاصه على ايامنا كان الولد هو اللى بيجتهد علشان يلفت نظر البنت و البنت  تعمل تقيله وتسهر الليالى تحلم  وتتمنى  انه مش ييأس ويتركها  او يفهم ويقدر خجلها وترددها  وفى الغالب الاعم بيكون عارف ومتاكد انها بتحبه بس اهو عذاب وخلاص

 دلوقتى بقى تلاقى البنات هى اللى بتطارد الولد  ولما  تيأس منه تدور على غيره لاننا فى عصر السرعه عولمه نت  مدارس مشتركه  لو تركت ده هتلاقى غيره تقريبا الحب اصبح تسالى فى هذا العصر  ربنا  يسترها على شبابنا  وبناتنا

أهداء خاص جدا لنور ابنى

أمل زياده