الأربعاء، 2 نوفمبر 2011

انا مش مجنون




انا  مش مجنون

كلمه رددها المواطن مصرى وهو يقف امام قاضي القضاه
عندما قال له ما قولك في ما هو منسوب اليك
 نظر المواطن مصري الى القاضي قائلاً : يا سيدي القاضي
انا اسمي مصري
الا يحق لي ان اعبر حبي لمن احمل اسمها
قال له القاضي : يا راجل يا طيب فى حد يعمل اللى عملته ده
نظر اليه المواطن مصري قائلا : يا سيدي انا لم اقل الا ما انا مقتنع به ..
نظر القاضي حوله ثم قال له : طيب قولى  يمكن اقتنع  زيك !!!
تنهد المواطن تنهيده كبيره وهو يجول ببصره فى وجوه الحاضرين قائلاً :
سيدي ... انا فرحت جدا لما قامت ثوره فى البلد
وفرحت اكتر لما عرفت انها بتدافع عن حقوق المصريين فى العموم مش بوجه خاص
وكمان فرحت جدا واحتفلت مع الناس فى الشوارع لما تنحى المخلوع
وبعدين خفت زى الناس على البلد من الحراميه ومن المحتل ومن المغتصب
وبعدين فضل الناس اللى قامو بالثوره  يحاربو  البلطجيه والحراميه والمتسلقين  والراكبين للموجه وكل من له هدف او مصلحه او غرض
وبعدين لقيت حاجات بتظهر كل يوم فى البلد ما كنتش موجوده اضرابات واعتصامات
بتنتهى بكوارث
وبعدين لقيت فى ناس كده بتقول عايزين نمشى المجلس من اوائل ايام الثوره
كنت بتفرج واقول ليه
لقيتهم بيقولو لان الوزير بقاله اكتر من عشرين سنه وزير اكيد ولائه  للمخلوع
وبعدين الاقى ناس تانيه عاقله وحكيمه تقول : لالا مينفعشى المجلس يمشى وخفت على البلد  من كتر ماهما خوفونا عليها
لو المجلس مشى هيحصل زى سوريا ولبييا
طيب والحل  ايه
قالو نجتمع مع المجلس ونحدد مطالبنا
قعدنا ولقيت اصحابى بيصرخو وبيقولو الحقو الاحزاب والحركات مقابل وعود فى مجلس الشعب  اتفقت على عدم الحراك السياسى وحاله من البيات الشتوى
وبعدين لقيت تانى ناس بتقول الحقو البلد احنا اتخدعنا
خدعنا المجلس
سألت ازاى ؟
قالو المجلس  رسم وخطط لكل اللى بيحصل دلوقتى واننا اتخدعنا طوال السبعه  الشهور الماضيه ...
طيب ازاى ؟
قالو   راجعو كل  مانشيتات الصحف فى اوائل الثوره وبعد ان  تنحى المخلوع هتلاقى تصريحات  رنانه ترضى غرور الشعب وتثبت  مصداقية الجيش  وتزود من رصيده لدى الشعب
زى التحفظ على اموال المخلوع  واولاده
التحقيق مع كذا وكذا
وبعدين لمو كام واحد كده كبش فدا  وبعد ست شهور نلاقى لسه سويسرا بتعلن تجميد اموال اولاد المخلوع  طيب ازاى
فين مراته  طيب لا دى رايحه جايه على انجلترا  طيب ازاى
دى المفروض واحده خطر على الشعب ارضاء للشعب خليها قيد الاقامه الجبريه واحده اكيد ليها علاقات وبتعمل مؤامرات ونفسها تخرج ولادها من اللى هما فيه انت مش عارف قلب الام يعنى  دى ممكن تحرق علشان تخرج ولادها
حتى لو بريئه  احتياطي يا عم حدد اقامتها  لكن محصلشى
نيجى للمسرحيه الجميله بتاعة المحاكمه   طبعا فرحنا جدا لما حسينا ان فى تحقيق لمبدا المساواه  ومفيش فرق بين امير وغفير لكن لقينا العكس تماما  معامله سيئه لمحامين اهالى الضحايا والشهداء ومساحه كبييييييره لمحامين المخلوع وعصابته
 لا وايه كمان   الكل غير كلامه وقالو مصدرتش لينا اوامر بقتل المتظاهرين او تسوية الميدان  بالارض رغم ان ده كله كان بيتقال فى كل وسائل الاعلام داخلى وخارجي وموثق كمان  فى موقع المجلس
وبعدين لقينا حاجه جميله اووى  بلطجيه ولصوص بيقضو على الاخضر واليابس فى مصر  منعرفشى منين
معقوله مصر فيها كل اللصوص دى
والادهى من ده كله ان محد ش قادر عليهم ولا قادر يمسكهم سبحانه الله
وبعدين قالو ثوره يعني تغيير
لقيت  ان مفيش تغيير ولا حاجه يعني قبل الثوره كان محدش يقدر يقول رايه لان المعتقل وامن الدوله موجود
 وبعدين  بعد الثوره لقيت ان لو حد قرب من المجلس يصدر حكم  وقرار باعتقاله
ويدان بتهمة   اهانة القوات المسلحه
وبعدين المدونيين والصحفيين  ومقدمى البرامج
كل من يقرب او يتجرأ بالنقد للمجلس  يتم اعتقاله او يلغى برامجه ومش بعيد كمان نهدد بغلق القناه
طيب انا لو فكرت بصوت عالى شويه الناس تحاسبنى ليه
مش ممكن ده يكون امنيه   ولا خيال ولا حلم  حتى لو مستحيل التحقيق ليه اتحاسب على خيالى  ............ وحاجه اعتقد انها لن يكون لها تأثير بالمعنى الفعلى انا مدون ولست ناشط سياسى مثلاً
المهم اتفرجت وسكت يا بيه  وبعدين لقيت  حاجات غريبه جدا بتتنشر شويه يقولو الجيش دهس الناس وبعدين هو يقول لا  المهم    فى حل وحيد اننا نتهم حد انه سرق مدرعة جيش وسبحان الله عرف يسوقها رغم انه شخص عادى بس يلا اشمعنى ايام المخلوع كان كل مرتكب  جريمه  او مفجر ازمه فى مصر كان يا اما ماس  كهربائى او  الاخ معتوه  تقريبا ده اخوهم فى الرضاعه   وهو الاخ مجهول ...
وبعدين الامور هديت يا بيه قلت هشم نفسي بقى واروح  اشوف شغلي
لقيت ناس بتقولى الحق كان فى سته  مترشحين لمنصب الرئيس واحد منهم طار ..
قلت لهم طار ازاى طلع له جناحين يعني
قالو لى لا بالقانون طلع  بره
 قلت لهم طيب  بالسلامه المهم يلاقي مكان كويس  يناسبه
وبعدين لقيتهم بيقولو لى  بردو .. يا ابنى انت مش فاهم  ده الاول ...  باقى خمسه
كل واحد هنطلع له حاجه تطيره وبعدين نجيب حد بنحبه كلنا مين بقى
ماهى البلد مش فيها حد  مؤهل دلوقتى يبقى نجيب واحد عسكرى كده زى الفل
وبعدين بحكم عشرته للمخلوع نلاقى  خلال سنه كده المخلوع توفى فى  سجنه  معززا مكرما  واولاده طلعو براءه لان القضاه حبابيبنا
وطبعا انسى يا بيه ان الفلوس المسروقه  ترجع
 وبعد ده كله بيتهموني بالجنون يا بيه
طيب لو انت مكاني كنت هتعمل ايه ؟
 حدق القاضي اليه طويلاً : ثم قال    رفعت الجلسه للمداوله :
وفى غرفة المداواله  جلس القضاه يقولون :  ايه ده ...  ده طلع الناس فاهمه كل حاجه
 - طيب ليه ساكتين منتظرين ايه ؟
 - مش عارف  ... يمكن  زهقوا ولا يأسو
  -  طيب ..  وايه الحل دلوقتى؟
  - نحكم عليه بأيه ؟
 تبادل الجميع نظره  واتسعت ابتسامتهم وهم يتوجهون لقاعة المحكمه
وفى قاعة المحكمه تعلقت عيون المواطن مصري  بالقضاه
وجد القاضي يقول له: بناء على ما سبق وقلته  ايها المواطن
قررنا نحن 
بأيداعك  مستشفى الامراض العقليه
صرخ المواطن قائلاً : لااااااااااااا ........... انا مش مجنون ..
تمت






ليست هناك تعليقات: