الاثنين، 24 أكتوبر، 2011

مذكرات




مذكرات زوجه مصريه







من الحياة


طبعا دى حاجات عاديه ممكن جدا تكون فى اغلب البيوت المصريه
بس الحقيقه حبيت اشارككم بعض المواقف اللى روتها ليا احدى الصديقات

وطبعا كلنا عارفين بيوتنا كلها مشاكل وهموم وروتين يومى
الشغل ..... الاولاد مشاكلهم
النهارده الولد مريض لا .. اخوه اتنقلت له العدوى

طبعا بعد الشر على كل المتابعين
مشاكل ضغوط الحياه
غلاء .....حر..... زحمه مرور..... سحابه سوداء ....
وكان لابد من التوقف امام معامله الزوج
لانه فى الاصل داخل كل رجل طفل كبيير
فى منا من تتقن فن التعامل معه
ومنا من تمل بسرعه
ومنا من تجهل كيف تتعامل معه



وطبعا لازم نتفق ان المركب اللى ليها اتنين رؤساء لازم تغرق
فلازم يكون لمركب الزوجيه رئيس واحد لانه مادام ارتضى الطرفين تكوين بيت واسره وعائله
لابد ان يتحملو عواقب فعلتهم
يعنى لا اعاند وخلاص
ولا اجادل لو ادركت بفطنه المرأه ان الطرف اللى امامى
مش مقتنع
طبيعه بشريه ممكن او خلاف فى التنشئه
او مفهوم خاطىء عن ادارة الامور وازمات الحياه جايز جدا
لازم المراه الزوجه تكون حكيمه فى تصرفاتها وتتعلم متى تصمت
ومتى ترد
وهذا لا يمنع انها تنفجر كل مده كده اثبات وجود
وتعبير عن القهر والسخط واعتراض على سياسات الزوج




وتطبيقا لمبدأ نحن هنا
واياكى و ترك البيت مهما حصل
ده بيتك مملكتك
هو اللى يمشى !

يعنى مثلا لو لقيتى  الزوج  بيزعق على الفاضى  ... من غير سبب
يذكر طبعا تحت بند التلكيك
عادى جدا حطى اعصابك فى ثلاجه
وبمنتهى الهدوء وابتسامه الموناليزا وببروووووود
فى ايه؟
طبعا هو هيتجنن ويزعق اكتر
عاااااااااااااااااااادى جدا خاااااااااالص
يعنى اهو عامل جو فى البيت والله الزعيق له فوائده معنويا على اقل تقدير
يعنى بيشعر بوجوده
وحاجه تانيه اهو تغيير وتنفيس عن غضبه
واهو منظر امام الجيران احنا كمان عندنا زعيق اشمعنى انتو !

ولو  مثلا  فى نهار رمضان والدنيا صيام لقيتيه دخل المطبخ بعد يوم شاق فى العمل والحر
ومثلا اتعصب عليكى لان زجاجه مياه مش بارده ولا نصفها بس
عاااااااااااادى جدا اصل المغرب ممكن يأذن بدرى فى اليوم ده وهو شايل هم ان ما يكون فى مياه بارده
جاهله انتى ازاى مثلا تسيبى الزجاجه نصفها ولا لسه مش بارده
غريبه والله طيب دى الثلاجه شغاله طيب التقصير منين بقى ؟؟؟؟؟

ولا كأن عندك اطفال مش بيصوموا ولا لسه لا سمح الله الساعه 2 ظهرا والمغرب على 7 ونصف

بجد غلطانه فى حد لسه بيعمل كده ولا انتى بتحبى تجيبى الكلام لنفسك

يعنى لازم تقدرى ان مفيش حد صايم الا هو وان السبب فى السيجاره والقهوه
طبعا نقصهم بسبب الصيام هو السبب مش هو لا سمح الله
الازواج دووووووول ملائكه والله
شريره انتى

نيجى بقى لو الاولاد فى يوم العطله صحيو بدرى شويه وهو استيقظ على هزارهم ولا

حكاياتهم ولا يعنى لو صوتهم ارتفع شويه اطفاااااااااال يعنى
لازم تكونى مستعده لدش الصباح من التوبيخ على الصبح
وده لانك غلطانه اكيد ازاى مش قادره تسكتيهم امال وظيفتك ايه يعنى
ولا بطاريات الريموت كنترول خلصت
طيب ممكن جدا تعملىهم على وضع الاهتزاز بس 

************** 
تعالى بقى قولى تخيل اليوم رحت السوق ولقيت ان الخضار الفولانى بقى بسعر كذا
ايه الغلاء ده تلاقى نظرات الدهشه تعلو وجهه وكانه من كوكب تانى وكانه اول مره يسمع ان فى غلاء
مش لا سمح الله ان الغلاء حديث الفضائيات والمدينه ورجل الشارع
وتلاقى الاجابه فى استنكاااااااااااار ليه ؟؟؟؟
ناقص يقولك انتى السبب فى الغلاء ولا فى فساد المحاصيل ولا كمان سبب موجه الحر اللى افسدت المحاصيل

             
ويبقى يوم ما ظهرت له شمس لو كنتى مضايقه من تصرفات احد اقاربك وانتقدتى سلوك ما امامه
ياااااااااااااااه هات يا سرد بتجريح فى عائلتك وطريقتهم واسلوبهم فى الحياه واداره الازمات
واقد ايه كلهم سلبيات و كل ده بالتفصيل الممل ومع ملاحظه ذكر مواقف عفى عليها الزمن وبتكون نتاج فعل
يعنى رد فعل من جانبهم على امر ما
 وهات يا مدح فى عائلته ونجاح عائلته مش كفايه انجبت لنا الجهبز

***********

ويا سلام لو اشتكيتى من الولاد تخيل ابنك قال كذا او بدر من التصرف كذا
تلاقى على طول وابل من التأنيب انتى كده على طول شكوى تذمر
 مش بقولك الازواج دول ملائكه
 والخلاصه يعنى انتى سبب اى  كارثه طبيعيه فى العالم عادى جدا
ومش بعيد تكونى سبب تدهور الاوضاع الاقتصاديه فى البلاد ولا انهيار البورصه ما انتى كزوجه سرك باااااااااااتع
وهو كتر خيره متحمل وساكت
*************

وروت لى صديقه انها اتخانقت مع زوجها بسبب مول

تخيلو هى بتقوله هاخد التاكسى ينزلنى امام المول كذا علشان اروح الشارع كذا
وطبعا المول والشارع من ثوابت وعلامه مميزة للشارع
طبعا الزوج كتر خيره
افسد عليها معلوماتها وعكس الامر  طبعا هو اختلط عليه الامر بينه وبين مول اخر
الست لما يئست واما اصرار الزوج قالت له حاضر  انا هركب التاكسى وهو ادرى
وراحت تسالنى ازاى اروح للمكان الفولانى
فقلت لها عارفه المول كذا هو بجانبه

     
طبعا الست ضحكت وراحت حكت عن المشاده اللى بينها وبين زوجها
واجمعنا انهم استحاله يعترفوا انهم اخطأوا او حتى يسكتوا لازم الفتوى

     
تقريبا اللى مش بيقدروا يعملوه امام رؤساهم بيعملوة فى البيت جميل ان الواحد يكون قيادى
بس قيادى بعقل ومنطقيه مش كلام فى الهواء

يعنى لازم تكون اعصابك كلها فى الفريزر علشان ما تصابى بالامراض المزمنه
والغير مزمنه
***************
ويا سلام

لو طبختى طبخه ما ،   وما لها طريقه طهى الا كده
وفجأه على الاكل واثناء التناول تلاقى تساؤل بأندهاش
ايه ده ؟؟؟
طبعا الرد فى بساطه دى كذا
تلاقى الرد فى استنكار
لا طبعا محدش بيعمل كده حد يحط على البسله جزر مثلا
والمفروض الكوارع قبل ما تتقدم تتحمر!!!!!!!!!!!!!!1
حد يحمر الكوارع يااااااااااعاااااااااااالم الحقونا ............
والعجيب  فى الامر فعلا ان نفس الوجبات لها نفس طريقه الاعداد تقريبا يعنى
بس اللى بيتغير او بيفرق من واحده لاخرى النفس طريقه التقديم االتتبيله كده
بس اللى اكتشفته ان  نموذج الزوج ده متكرر فى كل البيوت



يعنى مثلا واحد اختلف مع زوجته على البابا غنوج هو يقول الباذنجان مسلوق
وهى تقول مشوى !
انا بشوف ان الاكل والمطبخ ده تخصص الزوجه والزوج ماله دخل فيه ان شاء تطبخ عدس

ولا ايه ؟  وكمان بشوف ان نموذج الزوج بتصرفاته كده تندرج تحت بند التلكيك وانه كطبع فيه بيتخانق مع دبان وشه
ومش عنده مشاكل تذكر زى الخلق والعالم
بس اللى مش عارفه افهمه ليه دائماً بيصب غضبه على الواحده   واكتشفت  مع الوقت ان الشكوى واحده تقريبا من كل الزوجات
بس االحقيقه ده مش معناه ان الزوجات ملائكه  لكن الاكيد ان
هناك  علاقه بين عمل الزوج وكاريره اللى بتترك عليه البصمات دى


*******************

هناك 5 تعليقات:

Bent Men ElZman Da !! يقول...

هههههههههههههههههههههههههه
فى شويه مواقف تحففففففه والله
اهو الرجاله كده
عمرهم مايعترفوا بخطأهم ابداااا
ولو حسوا انهم غلط بيقفلوا على الموضوع خالص عشان ماحدش ياخد باله

ربنا يبشرك بالخييير الواحد داخل على جواز وانا كده اترعبت ههههههههههه

كتاب المئة تدوينة يقول...

لقد قمتِ بإرسال هذه التدوينة للترشح لكتاب المئة تدوينة لكنها مخالفة للشرط الخاص بتاريخ النشر
لذا يعتذر فريق العمل عن عدم قبولها

كل التوفيق

لبنى أحمد نور يقول...
أزال المؤلف هذا التعليق.
كتاب المئة تدوينة يقول...

100posts.ebook@gmail.com
إذا كان لديكِ تدوينة بديلة ترغبين بترشيحها فرجاء أرسليها لنا على الإيميل قبل نهاية الأسبوع

shata يقول...

هههههههههههه كل الاتهامات للزوجه و" المعني في بطن الشاعر"