الحرب البارده



الحرب البارده

بين زوجه الابن والحموات الفاتنات

لكل مقبله على الزواج

 

فاكرين فيلم الحموات الفاتنات ولا حماتى ملاك

تقريبا الفيلم لخص العلاقه بين ام الزوج وزوجه الابن

وبين الزوج وام الزوجه

على العموم ممكن جدا الزوج يترفع عن المشاكل التى تسببها ام الزوجه

يمكن رجاحه عقل

ولا نظرا لانشغاله

اما المشكله الكبرى هى العلاقه بين الزوجه وام الزوج

طبعا الافلام تناولت الحرب البارده اللى بينهم  بطريقه سطحيه

لانه فى الاول والاخير كان الغرض النقد بطريقه كوميديه بس الواقع

بيقول ان الوضع مختلف كتييييير

ولكن ده لا ينكر ان ام الزوج بتحتاج معامله خاااااااااااصه جدا

 علشان كده تلاقى اى واحده مقبله على الزواج خائفه

وان صح التعبير ممكن تقول انها مرعوبه

طيب فيها ايه لو اعتبرنا ام الزوج   بمثابه ام لنا وعاملناها بالحسنى

مع مراعاه فارق االسن وطريقه التفكير اكيد مش هنحس بأ ى مشكله

بمعنى تانى لازم نقدر انها ام وضحت وسهرت علشان تجعل من الزوج رجل يعتمد عليه

وكمان ياريت بنظره مستقبليه نضع نفسنا مكانها لانه مع مرور الايام ستجدى نفسك مكانها بالفعل

وكما تدين تدان

يعنى لازم نراعى مشاعرها كأم  ونصمد امام حركات الحموات

والزوجه الناجحه هى التى تتقن معامله اهل الزوج

ولازم لا تستجيبى لاى استفزات كانت ولازم تخلى اعصابك فى تلاجه

لانه مهما حصل هتطلعى غلطانه

اولا لانك صغيره السن

وثانيا لان استحاله امهاتنا تغلط

دى ام مهما حصل ورضاها من رضا الرب

يعنى بالعربى كده كلى عيش وعيشى فى سلام

ههههههههه

وبعدين صعب جدا تغيرى من اسلوب حد بلغ من العمر ارذله

بس ممكن جدا اغير من طفل واعيد تشكيله ثم ازاى اساسا هتقولى انها غلطت مثلا

ماهو لازم نراعى السن

طيب خدى بقى شويه نصائح خاصه جدا

فى حاله اذا كنتى تسكنين فى بيت العائله

شوفى لازم تحطى فى دماغك نقطه معينه  ان الزوج  لو كان له اخوات ولهم زوجات

 سيكون هناك تنافس

بين الزوجات فى محاول كسب رضاء الاهل واستمالتهم نحوهم

فى الحاله دى اتعاملى عاااااااااادى جدا وبطبيعيه هتملكى القلوب لان مفيش احسن من البساطه علشان تدخلى القلوب

ولو تقربت منك احدى الزوجات وصادقتك خليكى فى السليم اوعى تشكى من اهل الزوج نهائى ليها

حتى لو هى اشتكيت لانها وقت الجد هتكون فى صفهم وهتكسب نقاط على حسابك

فتعاملك معاها على الحياد وباقتضاب

اشتكيت من ام الزوج

قولى يمكن ما كنتش تقصد

 او ربنا يهدى الحال لا تحاولى تنخرطى معاها فى تفاصيل وكدا هتخسرى كتيييير

تعالى كده نتخيل يوم فى بيت العائله

هتصحى الصبح عادى جدا كل الناس بيعملو كده

الزوج هيتناول فطوره  ويروح شغله انتى بقى  خلصى كل حاجه وراكى بسرعه كده

وانزلى او اطلعى لحماتك وانتى اخر اناقه  وبعد السلامات والذى منه

قولى انا جيت افطر معاكى

وتناولى معاهم الفطار بهدوء كده واستمعى طبعا لنصائح ام الزوج فى عمايل الوجبات

وكمان لا تنسى ابدائك الاعجاب بطبق الفول الخطير وياريت تطلبى  مقاديره صدقينى ده بيكون له اثر ايجابى

على نفسيه ام الزوج

وبعد الفطار ومن سكات كده روحى اغسلى الطبقين واشربى الشاى  معاهم

هتلاقى حماتك طااااااااارت بيكى كانك اخترعتى الذره

وبعد نصف ساعه رغى كده استأذنى وانسحبى ولو كنتى رايحه السوق مرى عليها وقولى ليها مش عايزة حاجه

اجيبها لك وانا راجعه

يا سلام هتفرح اوووى

 بتحس انها محور اهتمام واهى طريقه لتطويل حاله السلام العائلى

لازم نراعى طريقه التفكير ونكون حساسين فى طريقه المعامله

انما بقى تتذمرى وتقولى دى لما قابلتنا او شافتنا اتضايقت كشرت

قالت  كذا او كذا مش هتلاقى نتيجه غير حرقه الاعصاب بالعربى كده ومن الاخر كبرى الجمجمه

وتحاولى تحتوى الجميع وتكسبيهم وتذكرى ان هيجى يوم وتكونى انتى مكانها وكل مدين مدان

نيجى بقى للحاله الثانيه

    

لو كنتى ساكنه فى منزل منفصل  ياااااااااه فضل ونعمه من عند ربنا

طبعا لازم فى المناسبات الرسميه تكلميها هاتفيا لاااااااااازم

وكل مده كده اتصلى اطمنى عليهم ويا سلام لو كلمتيها كل يوم

اكيد حاجه كويسه بس الحقيقه هتكون شويه متعبه ليه

كويس انك قولتى ليه اقولك يا ستى

اولا ممكن جدا تنسى فى يوم انك تكلميها ماهو انتى ذاكرتك مش دفتر وكمان مع زياده الالتزمات عليكى ممكن يمر يوم وما تنتبهى وكمان  ما هو الحوار المشترك اللى بينكم اللى هتتكلمو  فيه بانتظام 

وبعدين على كل الاحوال هيندرج تحت بند التبذير والرغى بدون داعى يبقى ايه كفى الله  المؤمنين شر القتال

وكمان ملحوظه لو حصل لا سمح الله وخرجتو معا لشراء شيىء حاولى انك ما تشترى حاجه لان ده هيتفسر

على انك مبذره حتى لو كنتى هتجيبى حاجه اساسيه بس اساسا هما كده بيحبو توجيه التعليمات وانتى اكيد هتضايقى فمنعا لكل ده خليكى عااااااااااااااادى جدا وبلاش عكننه على الفاضى

وياسلام لو وانتى معاها كده اعزميها على مشروب ولا عصير يااااااااااه حاجه جميله جدا فعلا حاجات بسيطه بس بتأثر بالايجاب فى العلاقه بين الطرفين

طبعا مش عايزه اقولك انك لو ساكنه فى نفس المحافظه لا داعى اطلاقا للبيات عند اهل الزوج اما لو كنتى من خارج المحافظه مفيش مانع بس لا تطولى البقاء

ثالثا بقى  تساؤل

مش عارفه الاقى منه نتيجه ليه الحموات مش بيحبو زوجه الابن ليه العداء ده

الغير مبرر

ده المفروض الزوجه ريحت الام من شخص كان المفروض عبء بمطالبه على الام فى سنها الكبير ده

ليه دايما الكلام من الام او زوجه الابن بيحمل معنانين ويتفسر على انه شيء سيء

ليه لو فرض مثلا وزرتى ام الزوج وكانت على علم بالزياره تلاقى امراض الدنيا فجأه جاءت لها

او ليه تقابلكم بفتور حتى لو كنتوا لشهور ما تقابلتم

ازاى نقضى على الحساسيه فى العلاقه بين الطرفين

لان كم من بيت اتهدد استقراره بسبب الحرب المعلنه والغير معلنه بين ام الزوج وزوجه الابن

بجد تساؤلات كتييره ياريت نلاقى لها اجابه

وان كنت اعتقد ان المعامله الحسنه ممكن جدا  تعمل على تحسين ونجاح العلاقه  حتى ولو على المدى البعيد

ثم من ناحيه اخرى هتلاقى النتيجه بركه وصحه فى بيتك واولادك يعنى الصبر على الابتلاءات المختلفه وسوء الطباع اكيييييييييييد لها ثوابها من الله عز وجل

وكما كنا نقول دائما من زرع حصد انتى ازرعى معامله حسنه هتحصدى حب حتى لو من  شخص كنتى تعتقدى انه اخر حد ممكن تلاقى منه  كده حد عنده اعتراض على الكلام ده

وياريت لو حد عنده مواقف جمعته بحماته يحكى ويقول اتصرف ازاى اهى كله للافاده